Ertzaintzak kamioiak eta autobusak kontrolatzeko kanpaina indartuko du 19tik 25era, istripuak saihesteko

Ertzaintzak kamioiak eta autobusak zaintzeko eta kontrolatzeko kanpaina indartuko du astelehen honetatik igandera bitartean, hilaren 19tik 25era, istripuak saihesteko. Gidaldiak eta atsedenaldiak betetzen diren edo segurtasun-uhalen erabilera egiaztatu nahi du, besteak beste, Ertzaintzak.

Eusko Jaurlaritzako Segurtasun Sailak ohar baten bidez jakinarazi duenez, helburua "erabilera publikoko errepideetan zirkulatzeko arauz ezarritako eskakizunak betetzen direla egiaztatzea da".

Alde batetik, gidaldiak eta atsedenaldiak kontrolatuko dira, baimendutako gidatze-orduak gainditzen diren eta ezarritako atsedenaldiak egiten diren egiaztatzeko. Era berean, ibilgailuen takografoak ondo funtzionatzen duen eta miaketak faltsutzeko eta polizia-kontrolak saihesteko manipulatu den zainduko da, eta hori dokumentu ofiziala faltsutzeko delitutzat jotzen da.

Kamioien kasuan, gainera, karga baimendutako pisua baino handiagoa den eta ondo lotuta dagoen egiaztatuko da. Autobusetan, bidaiariek segurtasun-uhala jantzita daramatela zainduko da.

Arau-hausteak prebenitzea

Estibaliz Olabarri Eusko Jaurlaritzako Trafiko zuzendariak adierazi duenez, "zaintza- eta kontrol-kanpaina horiek istripu larriak eragin ditzaketen arau-hausteak prebenitzera bideratuta daude". "Gainera, tamaina handiko ibilgailuen kasuan, hala nola kamioien edo autobusen kasuan, pertsona asko garraiatzen baitituzte, ondorio garrantzitsuak izan ditzakete".

Kanpaina hau Trafikoa eta Garraioa Zaintzeko eta Kontrolatzeko 38 kanpainako egutegiaren parte da. Kanpaina horiek urte osoan zehar egingo dira, jokabide arriskutsuak saihesteko.