Bi hilabetez luzatuko dira

Bihar hasiko dira berriro Errondo mendi-hegalaren egonkortzerako lanak

30.06.2020 | 12:45
Errondo mendi-hegalaren egonkortze lanak hasiko dira berriro.

DONOSTIA. Martxoaren 14an koronabirusa dela eta ezarritako alarma estatuak egiten ari ziren obrak gelditzera behartu zuen. Orain, pixkanaka-pixkanaka normaltasunera itzultzen ari gara, eta bertan behera geratu ziren lan horiek berregiten hasi dira. Bihar, uztailak 1, Errondo gainaren hegala egonkortzeko lanak hasiko dira berriro. Obra horiek bi hilabetez luzatuko dira, eta horietara bideratutako aurrekontua 220.279,24 eurokoa da.

Orain arte hormigoizko behin-behineko horma bat jarri da ezpondari eusteko, espaloia hobetu eta pasealeku gainera irauli zen bitartean.

Lan hauek egin ondoren, azterketa geoteknikoa eskatu zen, mendi-mazela egonkortzeko irtenbiderik onena zehazteko. Hainbat izapide tekniko eta administratibo gainditu ondoren, uztailaren 1ean hasiko da obra.

Marisol Garmendia Hiri Proiektuetako zinegotziak adierazi duenez, "Azkenean, atal luze bat itxi da, mendi-hegal ezegonkor batean obrak oso konplexuak direlako; gainera, Euskotrenen trenbide-sarea behealdean dagoenez, kontu handiz lan egin behar da".

Garatu beharreko irtenbidea da mendi-mazelaren goiko aldetik igarotzen diren ur-fluxuak moztea. "Euri-ura gidatzeko beharrezkoak diren drainatzeak eta kanaletak jarriko dira, eta mazelari eusteko mikropilotezko pantaila bat jarriko da, mazela saneatu eta lur-jausiak eragotziko dituen sare baten bidez babesteko", adierazi du Hiri Proiektuen zinegotziak.

DBUSEKIN HARREMANETAN

Lan horiek irauten duten bitartean, semaforoa mantenduko da, ibilgailuei bide alternatiboa eman diena. Marisol Garmendiak adierazi duenez, "Lanen bigarren hilabetean zirkulazioa erabat moztu beharko da Errondo gaineko igoeran. Lan zailak dira, Euskotreneko trenbideetan lan egiten delako eta kontu handiz ibili behar delako trenbideko trafikoa edo azpiegiturak kaltetuko dituen edozein luizi saihesteko ".

Ildo horretan, Dbusekin lanean ari dira inguruko etxebizitzei zerbitzua ematen dien garraio publikoari aukera bat emateko, San Juan de Dios barne. 23, 32 eta B9 lineak dira.