BILBO. Orain dela bi ikasturte, 2017/2018an, Euskadiko unibertsitateen ikasleen % 73ak unibertsitate publikoak aukeratu zituzten euren ikasketak burutzeko. Guztira 66.757 ikasle matrikulatu ziren; hau da, % 0,7ko igoera erregistratu zen aurreko ikasturtearekin alderatuz. Datu hau oso interesgarria da kontuan izanda aurreko hiru ikasturteetan behera egin zutela zifrak. Emandako datuak Eustatek argitaratutakoak dira.
Graduko ikasleak guztien % 85 dira, eta ikasle horien kopuruak % 0,7ko igoera izan du aurreko ikasturtearekin alderatuta. Gainerako % 15ak graduondoko ikasketetan matrikulatu dira, hots, master ofizialetan eta doktoregoetan. Lehenen kasuan, igoera % 2,4ra iritsi da, eta doktorego-ikasketen kasuan, berriz, % 1,2ra.
Unibertsitate publikoak unibertsitateetako ikasle guztien % 73 hartu ditu, eta portzentajezko 8 puntuko beherakada izan du azken zazpi urteetan. Graduko ikasketetan, ehunekoa bera da (% 73). Masterrak egiten dituzten ikasleen ehunekoa % 61era jaitsi da, eta Euskal Autonomia Erkidegoan egiten diren doktoregoen kasuan, berriz, % 90era igo da.
Ikasketak egiteko lekuari dagokionez, ikasleen % 59k Bizkaiko unibertsitateetan egin dituzte ikasketak, % 29k Gipuzkoako unibertsitateetan eta % 12k Arabakoetan.
Graduko ikasketak egiten dituzten emakumeen kopurua % 54ra iritsi da
Graduko ikasketetan, emakumeen kopurua handiagoa da, portzentajezko 9 puntuko aldearekin. Azpimarratu beharra dago 18-21 urteko ikasleen kasuan emakumeen kopurua gizonena baino portzentajezko 14-10 puntu handiagoa dela, geroago bi sexuen kopurua parekatzen bada ere.
Doktoregoei dagokienez, emakumeek duten aldea txikiagoa da (4 puntukoa), eta masterretan, berriz, bi sexuen kopurua parekatuta dago.
Euskal Autonomia Erkidegoan, 18 urteko biztanleen % 44k unibertsitate-ikasketaren bat egin du, eta eskolatze-tasarik handiena duen bigarren Erkidegoa da
Unibertsitate-ikasketei lotutako eskolatze-tasak autonomia-erkidegoen artean alderatuta, Euskadin 18 urteko gazteen % 44 daude unibertsitatean matrikulatuta, eta zerrendako bigarren erkidegoa da, Madrilen atzetik (% 52), Estatuko batezbestekoa baino portzentajezko 11 puntu gehiagorekin.
22 urteko ikasleen kasuan, Euskadiko ehunekoa % 35era iritsi da, eta tasarik handieneko hirugarren autonomia-erkidegoa da, Madrilen eta Gaztela eta Leonen atzetik (% 52 eta % 39, hurrenez hurren). 24 urteko ikasleen kasuan, berriz, Euskal Autonomia Erkidegoko ehunekoa % 17,5 da, hau da, Estatuko batezbestekoa baino txikixeagoa.
Generoa erabakigarria da unibertsitate-karreraren aukeraketan
Euskal Autonomia Erkidegoko unibertsitateren batean graduko ikasketetan matrikulatuta dauden 56.558 gazteetatik, erdiak honako ikasketa hauetako batean matrikulatu dira: Enpresen Administrazioa eta Zuzendaritza (5.680), Lehen Hezkuntza (3.927), Zuzenbidea (3.569), Psikologia (2.740), Ingeniaritza Mekanikoa (2.209), Haur Hezkuntza (2.120), Medikuntza (1.802), Erizaintza (1.524), Gizarte Hezkuntza (1.475), Industria Teknologiaren Ingeniaritza (1.431), Gizarte Langintza (1.315) eta Industria Elektronikaren eta Automatikaren Ingeniaritza (1.198).
Generoa erabakigarria da unibertsitate-ikasketak aukeratzeko garaian. Izan ere, titulazioen % 37tan emakumeak dira gehiengoa, beste % 37tan gizonak, eta titulazioen % 25etan baino ez dago orekatuta bi sexuen kopurua.
Irakaskuntzen artean, emakumeen oso ehuneko handia (% 89-76) duten honako hamar hauek azpimarratu behar dira (gehienak gizarte-arlokoak dira): Haur Hezkuntza, Erizaintza, Hizkuntza Modernoak eta Kudeaketa, Pedagogia, Itzulpengintza eta Interpretazioa, Ingeles Ikasketak, Psikologia, Giza Nutrizioa eta Dietetika, Gizarte Langintza eta Kultura Ondareen Kontserbazioa eta Zaharberritzea.
Gizonei dagokienez, gradu batzuetan gizonen ehunekoa oso handia da (% 95-84), eta guztiak ingeniaritza-arlokoak dira.Azkenik, parekotasunik handieneko graduak honako hauek izan dira: Industria Diseinuko eta Produktu Garapeneko Ingeniaritza, Marketina, Soziologia, Ingurumen Ingeniaritza, Arkitektura Teknikoa, Ingurumen Zientziak, Geomatikaren eta Topografiaren Ingeniaritza, Matematika eta Industria Antolakuntzaren Ingeniaritza.
2017/18 ikasturtean, 12.820 gaztek amaitu dituzte ikasketak, eta % 57 emakumeak izan dira
2018an ikasketak amaitu dituzten 12.820 gazteetatik, 9.209k gradu-titulua jaso dute, 3.244k master ofizialaren titulua, eta 367 doktoratu egin dira. Gradu-ikasketetan, batez besteko adina 23,6 urte izan da, masterren kasuan 26 urte, eta doktorego-tituluaren kasuan 34,5. Ez da alde handirik egon gizonen eta emakumeen artean.
