BILBO. Jakinarazpen pertsonaleko sistema hautatu da etxebizitza eskatu duten pertsonekin dauden komunikazioak hobetzeko eta berme gehiago emateko borondateagatik, haietatik ondorioak sor daitezkeelako beste zerbitzu edo gizarte prestazioen erabileran, Eusko Jaurlaritzako Ingurumen, Lurralde Plangintza eta Etxebizitza Sailak jakinarazi duenez.
Orain arte, Etxebidek hilero jakinarazten zien pertsona interesdunei eskaeren alta, baja, artxibatze, ukapen eta zuzenketei buruzko ebazpenak, Etxebizitza Sailaren lurralde ordezkaritzen iragarki tauletan eta bere web orriaren iragarki taula elektronikoan argitaratuta. Sistema hau erabiltzeko arrazoia egindako jakinarazpenen bolumen handia da. Iaz bakarrik 340.000 komunikazio egin ziren.
Hala ere, izapide horietako batzuk Etxebizitza Eskatzaileen Erregistroan banaka komunikatzeko premia egiaztatu da, pertsona eskatzaileek behar bezala dakizkitela ziurtatzeko. Jakinarazpen pertsonala izapide hauetan pasatuko da: alta, ukapen edo artxibatzeetan eta datuak zuzentzean edo zabaltzean. Aldaketa hau bat dator Arartekoak egindako gomendioarekin.
Horren bidez, Etxebizitza Eskatzaileen Erregistroko izapide batzuk banaka jakinaraztea eskatzen du, gizarte bazterketako arriskua prebenitzeko prestazio ekonomikoen kudeaketan duten eraginagatik. Prestazio horietako bat da Lanbide Enpleguaren Euskal Zerbitzuak kudeatzen duen Etxebizitza Prestazio Osagarria, Lanbidek berak kudeatu eta Etxebideko erregistroan aurrez izena ematea eskatzen duena.
Banako jakinarazpen sistema berriaren ezarpena martxoaren 1ean jarriko da abian. Horren guztiaren berri emateko, gutuna bidaliko zaie Etxebideko Etxebizitza Eskatzaileen Erregistroan inskribatutako guztiei. Bidalketa horiek astelehen honetatik otsailaren amaiera arte ari dira egiten, hiru txandatan.
Igorriko den gutunaren atzealdean, pertsona interesdunek euren espedientearen laburpen bat aurkituko dute, eta euren posta edota posta elektronikoaren helbidea eguneratzeko gomendioa, aurrerantzean Etxebideren jakinarazpenak jasotzeko. Inprimakiak ere badaude eguneratzeak
Zuzenean Zerbitzuko bulegoetan egiteko. Era berean, www.etxebide.euskadi.eus helbidean tramite gehienak egin daitezke, web orrian bertan pasahitza aurrez eskatuta. Aldaketa horien berri emango zaie EAEko udal guztiei ere.
