Zirrikituetatik begira

Metafora

19.08.2020 | 00:15

Andre Maria Zuriaren plaza, Gasteizen, zeharkatzen ari naiz presaka. Mandatu batzuk egitera atera naiz, baina etxera bueltatu behar dut han hitzordua dudalako. Nire zain egongo dira. Berandututa nabil. Plazan hiru pertsona bitxi ikusi ditut, ozta-ozta ikusi ere. Tunika luzeak janzten dituzte; oihala, zakuak egiteko erabiltzen zena, uste dut; hegal zabaleko kapela lastozkoak, margolan inpresionistetan agertzen ziren antzinako nekazariak etorri zaizkit gogora; aurpegi aurrean erlezainen edo, agian hobe, XX. mendearen hasierako emakume aberatsek eramaten zituzten gaza haiek, edo horrelako zerbait. Oso geldo doaz Plaza Berrirantz. Presaka noa, ikuspenak segundo pare bat iraun du. Etxerako bidean pentsatu dut Udalak edo Aldundiak antolatutako "circenses" bat izango zela ikusitakoa, gu, herritar aspertuok, entretenitzeko erakunde publikoek egiten dituzten gauza horiek. Baina ez zait iruditu ikuslerik zegoenik.

Ordu erdi bat geroago. Posta kaletik Foru Plazarantz lagun batekin. Beste hitzordu bat dugu. Bat-batean Andra Maria Zurian zeunden hirurak ikusi ditut. Gurditxo bat daramate herrestan, fruta kaxa bat edo. Barruan landare batzuk. Oraingoan esku-besoak altxaturik dituzte, apaizak mezetan bezala. Atzean dozena-erdi pertsona doaz kartoizko pankartatxoekin. Haietako batean planetaren aldeko esaldi bat irakurri dut gaztelaniaz. Prozesioaren traza hartu diot ikusten ari naizenari. Batek salmodia antzeko zerbait hasi du. Planeta arriskuan dagoela eta. Hasieran izan dudan antzerkiaren ideiatik errito erlijiosoaren ideiara jauzi egin dit buruak. Erdi Aroan hainbat eskualdetan zebiltzan "flagellanti" taldeez oroitu naiz, euren buruak zigortzen zituztenak, badakizue. Zer esango luke Joseba Gabilondok?

Nirekin doanak, nekazaria lanbidez, bota du. "Lehortuko zaizkie landare horiek guztiak, zimeltzen hasi dira". Irribarre maltzurra egin dut. Berehala konturatu da gaiztakeria prest dudala mingainean eta, ni baino pertsona hobea denez, gaineratu du: "Agian landare zimeltzen hasiak eramatea metafora bat da, jendeari demostratzeko planeta arriskuan dagoela benetan". Metaforarena gustatu zait.

Más información