Eraikuntzaren sektorearen jarduera % 7,2 hazi zen Estatuan 2023an, aurreko urtean baino % 5,5 gehiago, Nalanda Estatuko enpresa-jarduerak koordinatzeko dokumentu-kudeaketarako plataformaren datuen arabera.
Aldi horretan, eraikuntzaren sektoreak 20.044 obra eskaini zituen plataforma horretan, 2022an argitaratutako 18.696 obren aldean, baina urteko bigarren seihilekoan hazkundea moteldu egin zen, 9.603 obrarekin, aurreko urteko aldi berean baino % 3 gehiago soilik.
Eskainitako obren % 78k 500.000 eurotik beherako aurrekontua izan zuten, % 11k 1 eta 10 milioi euro artekoa, eta 10 milioi eurotik gorako kostua zuten obrek guztizkoaren % 2 bildu zuten.
2023an autonomia-erkidegoen arabera eskainitako obra gehien Katalunian egin ziren, obra guztien % 19 baino gehiago (3.853); ondoren Andaluzian (3.005, merkatuaren % 15), Madrilen (2.256, % 11) eta Valentziako Erkidegoan (2.058, % 10).
2023an, Nafarroan (% 31), Kanarietan (% 26), Galizian eta Errioxan (% 24) eta Asturiasen (% 23) hazi ziren gehien obrak. Batez bestekoaren gainetik hazi ziren, halaber, Ceuta (% 21), Murtzia (% 18), Valentziako Erkidegoa (% 17), Gaztela eta Leon (% 16) eta Aragoi (% 12).
Aitzitik, Estatuko batez bestekoaren azpitik daude Katalunia ( % 5), Madril ( % 3) eta Euskal Autonomia Erkidegoa ( % 2). Urtean gehien jaitsi ziren erkidegoak Kantabria (%-35), Melilla (%-21) eta Gaztela-Mantxa (%-6) izan ziren.
Bestalde, obra bakoitzeko azpikontraten batez bestekoa 4,2 enpresa izan zen, eta obra bakoitzeko 98 langile, 2022an baino % 6 gutxiago; beraz, azpikontratatutako enpresa bakoitzak 24 langile zituen batez beste.
"Jardueraren hazkundea gorabehera, obra bakoitzeko langileen murrizketa hori eraikuntza-prozesu batzuk gero eta automatizatuagoak izatearen ondorio izan daiteke: kontratistak eta horien hornidura-katea gero eta eraginkorragoak dira, eta horrek sistemaren iraunkortasuna areagotzen du", azaldu du Ricardo Muriel Nalandako Marketineko zuzendariak.
