Laudioko Udalak apustu garrantzitsu bat egingo du Europako beiraren erreferente bihurtzeko. Sektorea oso garrantzitsua da herriarentzat, momentu honetan hiru beira-enpresa baitaude, eta beira berreskuratzeko laugarren bat.
Herriak elementu horren erreferente gisa kokatzeko duen potentzialaz jabetuta, eta industriak motor sozio-ekonomiko gisa duen garrantzia galtzen ari den testuinguru batean, gobernu-taldeak beste urrats bat egin du eta kokagunerako proiektu integral bat garatu du: Laudio Glass Hub.
"Proiektuaren helburu nagusia gure herria lurralde estrategiko gisa kokatzea da beiraren sektorean, berrikuntza eta ezagutza eta enpresa-jarduera erakartzeko gune bat sortzea bilatzen duten hainbat ekimen garatzeko esparru bat. Laudiok horretarako ahalmena du ", nabarmendu du Ander Añibarro alkateak.
Eraldaketa eraginkorra eta bermeduna egiteko, hainbat eragileren arteko lan-eredu koordinatu eta kolaboratzaile baten bidez garatuko da proiektua, helize laukoitzekoa ere deitua. "Sare publiko-pribatuko lan-eredua da. Eragile publiko eta pribatuen arteko lankidetza aktiboa eta eraginkorra izango da eraldaketarako eta sinergiak bilatzeko oinarria", adierazi du. Proiektua tokiko gobernutik abiatzen da, eta dagoeneko Eusko Jaurlaritzarekin eta Arabako Foru Aldundiarekin partekatu da, eta interesa erakutsi dute.
Halaber, joan den uztailaren 9an, lehen lan-saio bat egin zen herriko eta inguruko beirate-enpresa nagusiekin, proiektua aurkezteko, haien beharrak ezagutzeko eta parte-hartzea sustatzeko. Ondoren, erakundeek proiektuarekiko konpromisoa hartu zuten
IKERKETA, PRESTAKUNTZA ETA TURISMOA
Laudio beiraren lurralde estrategikotzat hartzeko, gobernu-taldeak hiru proiektu ditu buruan. Lehenengoan, sektoreari lotutako ikerketa eta berrikuntza-ekosistema bat martxan jartzea aurreikusten da. Helburua argia da: beira sektorearen europar ezagutza eta berrikuntza Laudion zentralizatzea, udalerrian bertan ikerketa eta testatzea bultzatzeko. "Produktu berrien inguruan ikertuko da, prozesuak hobetuko dira eta ekonomia zirkularra sustatuko da", zehaztu du Añibarrok.
Bigarren ekimenaren helburua herriko Lanbide Heziketa eta prestakuntza-espezializazioa indartzea da, hainbat sektoretan gradu eta ziklo berriak txertatuz eta beiraren sektoreko prestakuntza aitzindaria sartuz. Hirugarren eta azken proiektua MICE turismoari lotutako estrategia bat sortzean datza, beira leitmotiv gisa hartuta, eta jasangarritasunean eta industrian ardaztuta, "Laudio marka" sortzeko palanka gisa. Hori guztia tokiko turismo-planarekin bat etorriz.
KOKAPEN PRIBILEGIATUA
Laudiok kokapen geografiko pribilegiatua du. Igarobidea da eta Arabako hiriburua eta Bilboko Portua lotzen ditu. Hori dela eta, udalerria funtsezkoa da salgaien trafikorako. Industria handia du, eta enpresa liderrak eta munduko erreferenteak ditu bere sektoreetan (tubular industria, beira, etab.). Herriko beste atal erakargarrietako bat da landa-ingurune zabal eta aberatsa duela, hiri-inguruneekin ondo lotuta dagoena eta etorkizunean garatzeko aukera handiak dituena. Gainera, bere inguruko herrien buru ere bada, lanbide-heziketako prestakuntza-eskaintzaren kalitateagatik eta merkataritza eta zerbitzu-eskaintza aberatsa izateagatik.
