Denak lanean daude

Sestaok 73 langile kontratatu ditu enplegu-planari esker

18.01.2021 | 18:04

SESTAO. Lanean daude dagoeneko Sestaoko Udalak Lanbiderekin batera abiarazitako azken enplegu-planari esker kontratatutako 73 bizilagunak. Bi administrazio publikoek 1,4 milioi euroko inbertsioa egin behar izan dute ekimen hau aurrera eraman ahal izateko.

"Enplegu-planen edizio hau covid-19aren ondorioz bizi dugun ekonomia- eta gizarte-egoerarekiko bereziki sentikorra da. Horregatik, berriz ere erakunde publikoek ahalegin ekonomiko garrantzitsua egin dugu, gure biztanleei suspertzen eta berriz ere lan-merkatuan sartzen lagunduko dien esperientzia eskuratzeko", aipatu du Enplegu zinegotziak, Jesús Amenedok.

Sestaoko Udalak leial bete ditu Lanbidek enplegu-planei buruzko deialdiaren oinarrietan finkatutako baldintzak. Enplegu-plan orokorrean sei hilabeterako egin diren 70 kontratazioetatik, 29 emakume eta 41 gizon hartu dira, beraz, nahitaezko emakume-enpleguaren % 40 gainditu da. Halaber, beste eskakizun bat bete da, hain zuzen, taldearen % 30 kontratazioaren unean diru-sarrerak bermatzeko errentaren hartzaile izatea. Azkenik, 55 urtetik gorakoek % 15eko ehunekoa gainditu dute. Gidalerro horiek Lanbidek zehazten ditu, enplegua lortzeko orduan talde kalteberenek lehentasuna izan dezaten.

Gazteen enplegu-planari dagokionez, 30 urtetik beherako hiru pertsona kontratatu dira eta Udalerako lan egiteari esker, urtebeteko esperientzia bereganatuko dute.

Enplegu-planak abian jartzearekin, berriz suspertu dira honako programa hauek: hiria edertzea eta udal eraikinak nahiz lokalak egokitzea, mendekotasunak dituzten pertsonei laguntzea, udal agiritegia kudeatzea, kirol jarduna sustatu eta hobetzea, baita proiektu honen esparruan garatzen diren beste programa batzuk ere.

noticias de deia