Gaur hasiko dira

Zortzi film proiektatuko dira irailean Ermua Antzokian

03.09.2020 | 04:00

ERMUA. Gaur, irailak 3, osteguna, Ermuko Udaleko Kultura sailak Ermua Antzokiko programazio berriarekin hasiko da. Zortzi film eskainiko dira hilean zehar, lau zineklub formatuan eta beste lau haurrei zuzendutakoak. Noski, ikuskizun guztietan koronabirusari aurre egiteko osasun-protokolo guztiak bete beharko dira.

Programazioa gaur hasiko da, lehenengo zineklub saioaren eskutik. Bertan, Todo pasa en Tel Aviv filma emango da, Sameh Zoabi zuzendari palestinarraren komedia dramatikoa. Zinta honetan Salam ezagutuko dugu, Jerusalemen bizi den 30 urteko palestinarra, Ramallahn ekoitzitako 'Tel Aviv on Fire' telenobela ospetsuaren setean lan egiten duena. Egunero, telebista estudioetara iristeko, Salamek Israelen kontrol zorrotza pasatu behar izaten du. Han, kontrol postuaren ardura duen komandantearekin topo egiten du, Assirekin, eta honen emaztea telenobelaren fan sutsua da. Txundituta uzteko, Assi istorioa idazten hasiko da. Laster, Salamek Assiren ideiek gidoilari bezala igoera bat ekar zezaketela konturatuko da, eta bere sortzaile karrera hazten hasiko da. Todo pasa en Tel Aviv filma jatorrizko bertsioan azpititulatuta eskainiko da 20:30ean.

Igandean, irailak 6, 17:00etatik aurrera Onward eskainiko da, Pixar animazio etxe erraldoiaren azken lana. Dan Scanlonek zuzendutako filma hiri inguruko fantasiazko mundu batean girotzen da. Bi anaia elfo nerabe, Ian eta Barley Lightfood, abentura batean murgilduko dira, eta munduan aitarekin azken eguna igarotzea ahalbidetuko dien magiarik ba ote dagoen jakin nahi dute, hura hil zenean oso txikiak baitziren.

Programazioari buruzko xehetasun gehiago Ermua Antzokiaren mikrositean.

EMANALDIETARAKO SARRERAK

Zine denboraldi berri eta berezi honetan, itzulera mailakatua programatzea erabaki da, dena ondo dabilela egiaztatzeko. Hori dela eta, irailean ostegunetako zine-klubeko saioetara eta igandeetako haurrentzako zinemara mugatu da egitaraua. Horrela, lehen hilabete honetan ez da zine komertzialeko emanaldirik eskainiko.

Irailean, beraz, ez da Zinema Bonurik egongo, eta sarrera orokorrarekin soilik sartu ahal izango da zine-klubeko saioetara, 3,85 euroko kostuarekin. Kultura Sailak urrian zinema komertziala programatzea espero du, eta orduan jarriko da salgai berriro hileko bonoa. Bestalde, haurrentzako zinemarako sarrerek 3,05 euroko prezioa dute.

Guztia ahalik eta ondoen egin dadin, Ermuko Udalak eskatzen du, ahal den neurrian, programatutako edozein ikuskizunetara joan nahi dutenek sarrerak aldez aurretik eskuratzen saia daitezela. Horretarako, sarrera guztiak Ermua Antzokiko leihatila digitalean edo Lobianon egongo dira salgai, ohiko ordutegian.

SEGURTASUN NEURRIAK ERMUA ANTZOKIAN

Zinemara itzulera herritarrentzako osasun-segurtasun handieneko baldintzetan gauzatu ahal izateko, Kultura Sailak aldaketak egin behar izan ditu, kultura-programazioa garatzeko baldintzei dagokienez. Hala, osasun-neurriak ezarri dira, nahitaez bete beharrekoak Ermua Antzokira sartzeko eta bertan egoteko:

  • Pertsona bakoitzak bere maskara ekarri beharko du Ermua Antzokira sartu ahal izateko. Maskara uneoro jantzita eraman beharko da ikuskizunak irauten duen bitartean.
  • 10 urtetik beherakoek heldu batekin etorri beharko dute.
  • Sarrerak ez dira zenbakituko eta Ermua Antzokiko langileek esleituko dituzte eserlekuak, ikus-entzuleak iristen diren ordenaren arabera.
  • Ekitaldira behar besteko aurrerapenarekin joatea eskatzen da, sarrera ohi baino motelagoa izango baita eta sarrerak ez baitira zenbakituak izango.
  • Instalaziora sartzean, baita leihatilako ilaran ere, pertsonen arteko 2 metroko distantzia gorde beharko da.
  • Eserlekuen arteko 2 metroko distantzia-neurria ere gorde beharko da, batera datozen pertsona-taldeen kasuan izan ezik.
  • Ermua Antzokiaren edukiera murriztu egingo da, eta, beraz, sarrera aldez aurretik erostea eskatzen da. Murrizketa hori komunetan ere kontuan hartu beharko da: pertsona bakarra komun bakoitzeko, eta bakarra bi konketa bakoitzeko.
  • Ikuskizuna amaitutakoan, zuen eserlekuetan egon zaitezten eskatzen dizuegu, gure langileek irteera mailaka antolatu ahal izan dezaten.

Kultura Sailak ulermena eskatzen du egindako aldaketengatik eta aldaketa horiek egoera berezi horietan sor ditzaketen nahasmenduengatik, baina gogorarazten du neurri horiek guztiak Ermua Antzokira joaten diren pertsona guztien segurtasuna bermatzeko eta kulturaz osasun-baldintza onenetan gozatu ahal izateko hartzen direla.