250 pertsonako edukiera mugatuekin

16 kultur jarduerak alaituko dute Ermua uztailean

25.05.2020 | 12:46

ERMUA. Gaur goizean, Ermuko Udalak aurtengo Santixau jaiak bertan behera utziko dituela azaleratu du, eta herriko taldeak eta ostalariak aire zabaleko kultur jardueren programa alternatiboa prestatu dute aire zabalean aurrera eraman ahal izateko. Guztira, adin eta gustu guztietarako 16 jarduera prestatuko dituzte. Hori bai, 250 pertsonako edukiera mugatuarekin, segurtasun-neurriak eta pertsonen arteko distantzia bermatzeko.

Herriko taldeak izango dira ekintza hauetako protagonistak, beraiek egingo baitituzte ekimen horietako asko, antzerkia, zuzeneko musika, zinea eta dantza, besteak beste. Jardueren egitaraua uztaileko lehen asteburuan hasiko da, eta astero lau ekitaldi izango ditugu herrian: bat ostiraletan, bi larunbatetan, aldi berean, eta bestea igandetan. Ekitaldi gehienak Orbe Kardinala plazan izango dira, larunbatetako bi jardueretako bat izan ezik; horiek San Pelaio plazan egingo dira.

Programazio alternatibo honen helburu nagusia tokiko kultura bultzatzea da, pandemiak gehien zigortutako alorretako bat baita. Aldi berean, udalerriko ostalaritza-establezimenduei ere bultzada eman nahi zaie. Horrela, pixkanaka gure bizitza sozialari eta pertsonen arteko harremanei berrekin ahal izango diegu, betiere pandemia honekin amaitzeko beharrezko arauak betez.

EDUKIERA KONTROLATZEKO TIKET-SISTEMA

Jarduera guztiek 250 laguneko edukiera mugatua izango dute, eserita egongo dira eta eserlekuen arteko distantzia nahikoa izango da segurtasun-neurriak bermatzeko.

Edukiera kontrolatu ahal izateko, erabat doakoak izango diren tiketak aldez aurretik erreserbatzeko sistema bat ezarriko da, oraindik zehazteke dagoena. Horrela, ekitaldietan pilaketak saihestuko dira.

Gogorarazi behar da programazio hori osasun-agintarien gomendioen eta pandemiak izan dezakeen bilakaeraren mende dagoela une oro, eta, beraz, ez da baztertzen jardueren definizioan aldaketak egin behar izatea. Bestalde, erantzukizun soziala eskatzen da, osasun-neurriak betetzen ez dituzten pertsonen bilerak saihesteko.