Txurdinagako kanpoaldeko igerilekuetako jantzigelak birmoldatuko ditu Udalak

BILBO. Bilboko Udalak 604.600 euroko aurrekontua bideratuko du Txurdinagako kiroldegiko kanpoaldeko igerilekuetako jantzigelak eta komunak birmoldatzeko. Lanak gaur bertan hasi dira, otsailak 18, eta espero da maiatzaren amaieran amaitzea.

Hartara, ez zaie eragozpenik eragingo erabiltzaileei, jantzigelak eraikin nagusiari atxikitako eraikin batean baitaude, eta udan bakarrik erabiltzen baitira, kanpoaldeko igerilekuak irekita daudenean.

Bilboko Udalak, Bilbao Kirolak entitatearen bidez, 604.600 euro inbertituko ditu hobekuntza-lan horietan.

Itxaso Erroteta Gazteria eta Kirol Saileko zinegotziak nabarmendu egin ditu Udalaren apustua eta inbertsio-ahalegina, Uriko udal kiroldegiko instalazioak "hobetu, berritu eta modernizatzekoa". Errotetak nabarmendu du, orobat, obra hauek garrantzitsuak direla, "zeren eta udaro milaka pertsonak erabiltzen duten gune bat baita, eta berritzea behar baitu, erabiltzaileen, familien, dibertsitate funtzionala duten pertsonen eta eskoletako ikasleen beharrizanei egokitzeko..."

GUNE GEHIAGO, EROSOAGOAK ETA IRISGARRIAGOAK

Eremua berrantolatu egingo da, eta berritu, halako moldez non gune gehiago izango baitira, erosoagoak, funtzionalagoak eta irisgarriagoak. Lau gune berezitu izango dira: korridoreak edo ibiltzeko guneak, aldagelak – orokorrak, eskoletako ikasleenak, egokituak eta familienak–, dutxarako eta komunetarako gune bat eta gune osagarriak.

• Aldagelak: Berrantolaketari esker, gehiago izango dira jantzigelak: egun 2 dira, eta amaitutakoan 6 izango dira. Era horretan, 2 jantzigela orokor izango dira gero ere, oraingo berak, bat emakumeentzat eta beste gizakumeentzat, eta sartzeko eta irteteko zirkuitu bereiziak izango dituzte, eta horietaz gain, beste 2 eskoletako ikasleentzat, eta beste 2 familientzat eta dibertsitate funtzionala dutenentzat egokituak. Aldageletan, halaber, era bateko eta besteko altzariak izango dira, hala nola jarlekuak, esekilekuak, armairuak eta ume txikiak aldatzeko lekuak.

• Dutxen eta komunen gunea: Aldagelen barruan dutxa kolektiboak izango dira, eta lehortzeko lekua ere bai. Korridoretik sartu ahal izango da komunetara, bereizita egongo baitira; batzuk igerilekuko oinetakoekin sartzen direnentzat eta besteak kaleko oinetakoekin sartzen direnentzat. Komun egokituak aldagela egokituen eta familien-aldagelen ondoan izango dira.

• Korridoreak: erabiltzaileak ibiltzeko guneetan korridore bat egongo da, eraikinaren kanpoaldetik jantzigeletara eroango duena, eta beste bat jantzigeletatik kanpoaldeko igerilekuetara eroango duena. Horrez gain, tarteko korridore bat egongo da aldamen batean, eta eskoletako ikasleei eta familiei eta dibertsitate funtzionala duten pertsonei zerbitzu emateko izango da. Ibiltzeko gune guztiak edo korridore guztiak irisgarriak izango dira mugikortasun urritua duten pertsonentzat.

• Gune osagarriak: mantentze-lanetarako eta zerbitzuetarako guneak izango dira; besteak beste, instalazioen gela, biltegiak edo garbiketa-gela.

KAFETEGIKO TERRAZA

Lanen artean, orobat, aldageletako eta komunetako estalkian egin beharreko lanak daude, hau da, goiko solairuan kokatuta dagoen kafetegiko terrazan. Era horretan, asmoa da zoladura ordeztea, iragazgaiztea eta isolatzea, eta kanpoaldeko bidetik sartzeko irisgarritasuna hobetzea.

Azkenik, lan horien bidez, berritu egingo dira elektrizitatearen, argiteriaren, megafoniaren, suteen kontrako babesaren eta iturgintzaren instalazioak. Orobat, egurasteko kutxa berriak jarriko dira, egurastea hobetzeko.