Baldintza meteorologikoei aurre egiteko

Bilboko Udalak Elurteen Operatibo Berezia mantenduko du asteburuan

08.01.2021 | 14:14
Bilboko Udalaren elurra kentzeko makina bat, lanean.

BILBO. Asteburu honetarako espero diren muturreko baldintza metereologikoak direla eta, Bilboko Udalak Elurteen Operatibo Berezia mantentzea erabaki du. Euskalmetek eskainitako aurreikuspenaren arabera, 0 eta 200 metro arteko elurra egin dezake larunbatetik aurrera.

Hain zuzen ere, bihar, larunbata, 06:00etatik 24:etara Alerta Horia egongo da indarrean, elurragatik, eta egun osoa indarrean egongo da Alerta Horia hotzagatik.

Hori dela-eta, Bilboko Udalak prest eta berehala jarduteko moduan dauka operatibo berezia: garbiketa-zerbitzuetako langileak eta hainbat ibilgailu, uriko barruti guztietan banatuta. Izotzik ez egiteko prebentzio-lanak egingo dituzte eta, behar izanez gero, kaleetan pila daitekeen elurra kenduko dute.

Iragarpenaren aurrean, Udalak baliabide material hauek dauzka:

  • Kamioiak hortzekin eta gatza zabaltzeko makinarekin.
  • Pick-up-ak hortzekin eta gatza zabaltzeko makinarekin.
  • Erraztatzeko makina hortzekin.
  • Zisterna-kamioiak, gatzuna zabaltzeko makinarekin.
  • Kamioi-garabi bat, gatzez hornitzeko.
  • 200 tona gatz.

Era berean, prebentzio-neurri modura eta izotza egonez gero, garbiketako taldeek gatza eta gatzuna zabalduko dute kalterik handiena izan dezaketen hiri-guneetan: Artxanda, Enekuri, Miraflores gaina, Zabalbide kaleko zatirik altuena Arabella parean, Zurbaranbarri eta Lezamako Trenbide Zaharraren ingurua, Otxarkoagako zatirik altuena eta hiriko auzo altuetako hainbat leku (Zazpi Landa, Altamira, Kobetamendi, Mintegitxueta, Masustegi, Uretamendi–Betolatza, Artatzu Goikoa, Pagasarri bidea, Arraizko bidea, Buia).

Operatibo honen beste lehentasun bat da hiriko bide nagusiak eta zubiak erabiltzeko moduan izatea, izotz-plakarik ez sortzeko:

  • Ospitale, anbulatorio, klinika eta osasun-zentroen ingurunetan, batez ere Basurtuko Ospitalea eta Santa Marinako Ospitalera joateko errepidea.
  • Kale Nagusia eta Sabino Arana.
  • Hurtado Amezaga, Autonomia eta Montevideo etorbidea.
  • Errekalde zumarkalea eta Salbeko zubia.
  • Elkano, Deustuko zubia eta Agirre Lehendakariaren etorbidea.
  • Zumalacarregui etorbidea eta Maurice Ravel.
  • Zabalbide.
  • Zarandoa etorbidea eta Morgan

Halaber, merkatuetara, ikastetxeetara, garraio-zerbitzuetara (BilbaoIntermodal, eta autobus, metro eta treneko geltokiak eta geralekuak), osasun-zentroetara eta ospitaletara joateko sarrerak bermatuko dira; arreta berezia izango da Santa Marina Ospitalerako errepidearekin.

Prebentzio-neurri horiek hartuko dira, baita ere, oinezkoen pasabideetan (Zubi Zuri eta Arrupe zubia), espaloietan, eskaileretan eta aireko pasabideetan.

GOMENDIOAK

Elurragatik eta hotzagatik Alerta Horia dela-eta, Bilboko Udalak honako gomendio hauek eman dizkie herritarrei:

  • Nagusiak edo gaixorik dauden pertsonak etxean geratzea elurteak eta hotz-boladak irauten duen bitartean.
  • Kalean aterperik gabeko pertsonarik ikusiz gero, Udaltzaingora deitzea (092), udal baliabide desberdinetan aterpea eskaintzeko asmoz.
  • Autoa erabili behar izanez gero, kontu handiz ibiltzea. (Autoa berrikusi: balaztak, pneumatikoak, argiak, izotz-kontrako likidoa, bujiak...; martxa laburrekin gidatu, norabidea modu bortitzean aldatu barik). Izotzik badago, ez zapaldu balazta. Hobe duzu autoak izotz-eremua berez zeharkatzea. Ihes-hodia elur barik eta desblokeatuta eduki, horrela kea ez da autoaren barrualdera sartuko.
noticias de deia