BILBO. Bilboko Udalak beren horretan utziko ditu 2021eko udal zergak eta tasak, gaur egungo ordenantza fiskalak indarrean mantenduz. Horrela erabaki egin du gaur goizean, hilak 17, astelehena, Gobernu Taldeak. Horrekin batera, zergadunentzat dauden onura fiskalak eta ordaintzeko erraztasunak mantenduko dira.
Azken hilabeteotan egoera ekonomikoak izan duen bilakaera aztertu ondoren egin da proposamen hori, covid-19aren pandemiak eragin duen jarduera orokorraren geldialdiaren ondorioz. Horri gehitu behar zaio Bilboko herritarrei eta uriko enpresa-sareari laguntzeko borondatea.
Neurri honen bidez, zergei eusteko ahalegina egingo da udal-sarreren diru-bilketan beherakada handia izan den une honetan baina, era berean, aukera ematen du azken urteetan Udalak hartutako konpromisoarekin jarraitzeko, udal-kontu saneatu batzuk finkatzeko, zergadunari karga gehiago eragin gabe.
EGOKITZAPENERAKO ARAUDI-PROPOSAMENA
Gobernu Batzordearen gaurko bileran onartu ondoren, 2021. ekitaldirako arau-proposamen bakarra Zergen Kudeaketari, Bilketari eta Ikuskapenari buruzko Ordenantza Fiskal Orokorrari dagokiona da, Ordenantza Fiskala 2019ko abuztuan onartutako Bizkaiko Lurralde Historikoko Zerga-bilketari buruzko Erregelamenduari egokitzearen ondorioz. Ogasun Saileko zinegotzi Marta Ajuriak Batzordean azaldu die ordenantza alderdi politiko guztiei eta, hala, hasiera eman zaio aipatutako ordenantzari zuzenketak aurkezteko administrazio-izapideari, Ordenantza Fiskal Orokorraren aldaketa hasieran onartzeko eztabaidaren aurretik. Aldaketa hori irailean egingo da osoko bilkura.
