Bizkaiak 3i 2026 laguntza-programa aktibatu du
Lurraldeko enpresek 2026ko otsailaren 2tik 20ra aurkeztu ahal izango dituzte eskabideak
Bizkaiko Foru Aldundiko Gobernu Kontseiluak 3i 2026 laguntza-programaren deialdia onetsi du. Programaren hasierako zuzkidura 4.700.000 eurokoa izango da, berrikuntza, inbertsioa eta nazioartekotzea barne hartzen dituzten inpaktu handiko enpresa-proiektuak bultzatzeko. Enpresa txikien proiektu bakoitzak 450.000 euroraino jaso ditzake; ETE handiagoen proiektu bakoitzak, berriz, 500.000 euroraino.
Ekonomia Sustatzeko Sailak Bizkaiko enpresa-sarearen lehiakortasuna indartzeko duen estrategiaren parte da 3i programa, eta babesa ematen die eraldatzeko, hazteko eta kalitatezko enplegua sortzeko ahalmen handiena duten proiektu estrategikoei.
Laguntzak nortasun juridiko propioa duten enpresei zuzenduta daude, bereziki ETEei, honako hauekin lotutako proiektuak garatzen badituzte:
- Inbertsio produktiboa aktiboetan.
- Berrikuntza, inbertsio eta nazioartekotzerako aholkularitza-zerbitzuak.
- Atzerriko merkataritza-azoketan parte hartzea.
- Garapen esperimentala eta bideragarritasun-azterketak.
- Prozesuetako eta antolaketako berrikuntza.
- Patenteak eta aktibo ez-materialak lortu, baliozkotu eta defendatzea.
Programaren helburua da inpaktu-ahalmen handiko proiektu berritzaileak bultzatzea, berrikuntza, nazioartekotzea eta inbertsioa hazkunde jasangarrirako eragile gisa indartzea eta sostengu publiko handia eskaintzea Bizkaian enpresen presentzia sendotzen duten proiektu estrategikoei. 3i funtsezko tresna da Bizkaiko enpresei eraldaketa-, hazkunde- eta nazioartekotze-prozesu estrategikoenetan laguntzeko, haien lehiakortasuna eta lurraldearekiko sustraiak indartuz.
Eskabideak aurkezteko epea
Enpresek 2026ko otsailaren 2tik 20ra bitartean aurkeztu ahal izango dituzte eskabideak, telematikoki soilik, Bizkaiko Foru Aldundiko Ekonomia Sustatzeko Sailaren bulego birtualaren bidez.
Laguntzak norgehiagoka-prozeduraz emango dira, eta aintzat hartuko dira inpaktua, proiektuen kalitate teknikoa eta lurraldeko lehentasun estrategikoekin bat etortzea.
3i programaren bultzada berri honekin, Bizkaiak indartu egiten du bere eredu ekonomikoa: eredu aurreratu, industrial, berritzaile eta munduari irekia, kalitatezko enplegua, inbertsio produktiboa eta hazkunde jasangarria sortzera bideratua.