Durangoko Udala hainbat hobekuntza egiten ari da Ezkurdi parkean dagoen erakusketa aretoan, argiztapena optimizatzeko eta kultur jarduerak egiteko ingurune egokiagoa bermatzeko.

Ezkurdi parkea 1970ean inauguratu zen, eta Euskal Herriko Arkitektoen Elkargo Ofizialak emandako Arkitektura saria jaso zuen. Hainbat egokitzapen-jarduera egin dira urteetan zehar. Esku-hartze horiei esker, erabiltzaileen esperientzia hobetu ahal izan da, eta multzoaren nortasun estetikoa zaindu ahal izan da.

Espazio horren barruan, marrazketa eta pintura eskolak ere hartzen dituen erakusketa aretoa kulturarako erreferentzia gune bihurtu da Durangon. 290 m²-ko azalera du, eta 12.695,70 euro + BEZeko inbertsioaren bidez berritzen ari da, honako jarduera hauetarako: 

  • Luminarien ordez LED fokuak dituzten errei trifasikoak jartzea, energiaren eraginkortasuna eta argiztapenaren kalitatea hobetzeko.
  • Larrialdiko argiztapen-sistema bat instalatzea, segurtasun handiagoa izateko.
  • Pizte-sistema birmoldatzea, funtzionamendua optimizatzeko.
  • Sabaiak margotzea, ingurune berrituagoa eta atseginagoa lortzen laguntzeko.
  • Espazioaren baldintza akustikoak hobetzeko bozgorailu berriak eskuratzea

Hobekuntza horiekin, Durangoko Udalak kulturarekiko eta udal azpiegituren hobekuntzarekiko konpromisoa berresten du, herritarrek arte eta erakusketa jarduerak garatzeko espazio egokiez gozatu ahal izatea bermatuz.

Hobekuntzak Ermodo eta Trenbide arteko bidegurutzean

Bestalde, aste honetatik aurrera, hobekuntza-lanak egingo dira Ermodo eta Trenbide kaleen arteko bidegurutzean, inguruko saneamendu-sarean maiz gertatzen diren matxurak eta buxadurak konpontzeko.

Jarduketen barruan sartuko dira hondakin-uren bi kutxatila konpontzea eta hodi-zati bat ordeztea. Gainera, zaharkiturik geratu den edateko uraren hodi zahar bat kenduko da zerbitzutik. Hobekuntza horiek bi asteko epean egingo dira, eta 23.000 euroko aurrekontua dute. Azpiegituren funtzionamendua optimizatzea eta etorkizuneko arazoak saihestea dute helburu.

Udalak eskerrak eman dizkie Durangoko bizilagunei esku-hartze horien ondorioz sor daitezkeen eragozpenengatik, eta gogorarazi du jarduera horiek zerbitzu eraginkorragoa bermatzeko eta herritar guztien bizi kalitatea hobetzeko pentsatuta daudela.