Herritarren irisgarritasuna hobetze aldera, Nafarroa kaleko arrapala mekanikoaren ibilbidea luzatzeko lanak hasiko ditu Barakaldoko Udalak, Araba kalera iritsi arte, Arrontegi ikastetxea dagoen lekura, konkretuki. Auzoetarako Obra eta Azpiegituretarako zinegotzi den Jon Andoni Uriak ekimenaren nondik norakoak azaldu egin ditu.
Egungo arrapala mekanikoa joan den 2022an instalatu zen 500.000 euroko inbertsioarekin, eta Gaztela-Mantxa eta Gaztela eta Leon kaleak lotzen ditu. 40 metroko ibilbidea duen kalea da, eta aldapa handitu egiten da tarte horretan. Gaztela-Mantxa kalearen eta Arabaren arteko lotura egiteke zegoen, eta hori aztertzen ari dira proiektu honekin. Hortik ateratzen den dokumentuak aukera emango du obra kontratatzeko eta gauzatzeko.
Auzoetan irisgarritasuna hobetzeko irtenbideak bilatzea da Amaia del Campo alkatearen taldearen lehentasunetako bat, auzo atseginagoak, erosoagoak eta kohesionatuagoak bilatuz. Arrontegi auzoan, zehazki, hobetu egin zen anbulatorioaren irisgarritasuna, eta arrapala mekanikoak jarri ziren Arrontegi kalean. Duela urtebete eskas jarri zen martxan Etxatxu eta San Luis guneak lotzen dituen igogailua. Amaitu zen arrapala zati bat jartzea Nafarroan, auzoaren erdialdean, eta orain irtenbide teknikoa zehaztuko da, tarte horren irisgarritasuna goiko alderaino zabaltzeko aukera emango duena. "Arrontegi inguruan bakarrik 1,6 milioi inbertitu ditugu dagoeneko sarbide mekanikoetan, eta horrek, zalantzarik gabe, inguruko bizilagunen bizi-kalitatea hobetzea ahalbidetu du. Oraindik proiektu honekin auzotarren eskaerei erantzuna emango diegu ", azaldu du Uriak.
Proiektua idazteko 14.400 euroko inbertsioa egin behar da, eta enpresa esleipendunak 5 hilabeteko epea du azterlana egiteko.
10 milioi baino gehiago sarrera mekanikoetan inbertituta
Orain arte, 10 milioi euro inguru inbertitu dira Barakaldoko auzoak modu irisgarrian lotzeko sarbide mekaniko berriak sortzeko. Arrapala mekanikoak sortu dira Arrontegin (Arrontegi), Andikollanon (Lutxana- Llano), Eguzkiagirreren (San Vicente ¿ Zuazo Arteagabeitia) eta Nafarroa kalean (Arrontegi). Gainera, oinezkoentzako pasabideak sortu dira Desertu Berrian eta Retuerto eta Burtzeñan. Eta hiri-igogailuak sortu dira La Pazen (Gurutzeta), Arteagagoikon (Zuazo-Arteagabeitia), La Inmaculadan (Gurutzeta) eta Etxatxun (Arrontegi).
