Barakaldok 'Gabonetako artisau merkatua' jasoko du abenduaren 17an eta 18an

23 postuk hartuko dute parte datorren asteburuan, abenduak 17 eta 18, Barakaldon egingo den Gabonetako artisau merkatuan. Larunbatean goizeko 11.00etatik gaueko 21.00etara egongo da zabalik, eta igandean, aldiz, 11.00etatik arratsaldeko 17.30era.

David Solla Sustapen Ekonomikoko zinegotziak ziurtatu duenez, "herritarrek asko estimatzen dituzte horrelako merkatuak, hirian Gabonetako giroaz gozatzeko eta bertatik irteteko erakargarri izateaz gain, inguratzen gaituen talentu sortzailea aurkitzen laguntzen dutelako eta artisautzaren osagarri diren sektoreekin (ostalaritza eta merkataritza) fluxu positiboak sortzen dituztelako".

Sarbidea errazteko, goizetan triziklo elektrikoen bidezko garraio-zerbitzua jarriko da martxan udalerriko hainbat tokitatik. Gainera, postuetan erosketaren bat egiten dutenek bi zozketatan parte hartuko dute. Lehenengoa larunbatean izango da, Udal Merkatuan egingo den San Tomas eguneko ospakizunarekin batera, eta 10 talo txakolinarekin dastatuko dira. Bigarrena igandean izango da, 13:00etan, eta artisauek emandako produktuen saski baten zozketa egingo da.

Hauek dira merkatu honetan dauden denda, marka eta artisau partikularrak: Nire Panpinak, Artesanía Roberto, Sinergias Kármicas, By Sinuhe, Matxetenekua, Creaciones Monfofu, Jandameida, Uda Bilbao, LO&Ge, La Despensa de Anfi, Leike, Lurky Cotton, Lurrarium, Itxasloo, Ecotela, Ene Ttikia, Olivalolo, Karola Kosmetika Naturala, Irartesanía, Sigi-Saga, Berbelar Gazta Artisauak, Sendatuz eta En bici sin Edad y sin Barreras.

Nolanahi ere, ekitaldi honi buruzko informazio osoa Inguralderen webgunean dago eskuragarri.

Apustua "hand made" delakoaren alde

Artisautza Merkatuaren Gabonetako edizio honekin, Barakaldok iraunkortasunaren, tokian tokikoaren eta zero kilometroaren aldeko apustua berretsi du. Ildo horretan, Sollak gogorarazi du "egun bereziak direla artisauentzat, diseinatzaileentzat edo artistentzat, eta herritarrak animatu ditu produktu esklusiboen erakusleiho honetara hurbiltzera eta horretaz gozatzera, eta artisautza oparitzeko aprobetxatzera Eguberrietan".