Gabonetan adikzioak kudeatzeko jardunaldia antolatu du Bilboko Udalak

Osasun eta Kontsumo Sailak informazio- eta orientazio-jardunaldi bat egingo du bihar, adikzioak dituzten pertsonak Gabonetako jaietan berriz ez erortzeko arriskuak nola saihestu azaltzeko. Jardunaldiaren izenburua "Gabonetan zaintzea" izango da. Batez ere adikzio-prozesuetan dauden pertsonei eta haien senideei zuzenduta egongo da saioa. Jardunaldia Urrezko Gurutzea Elkartearen lokaletan egingo da (Iparraguirre 46).

Álvaro Pérez Osasun eta Kontsumo Saileko zinegotziak nabarmendu duenez, "saioaren helburua da pertsona horiei aholku espezifikoak ematea, jai-egunei aurre egiteko; izan ere, egun horiek egokiak dira gehiegikerietarako, eta, beraz, arriskutsuak izan daitezke adikzioan berriz erortzeko. Álvaro Pérezek adierazi duenez, «saio horien helburuetako bat da berriz kontsumitzen hastea prebenitzearen garrantzia nabarmentzea, eta, horretarako, estresa, frustrazioa eta beste eragile batzuk maneiatzeko trebetasunak eta estrategiak ematen zaizkio pertsonari, abstinentziari epe luzera eusteko».

Jardunaldia Adikzioen VI. Udal Planaren barruan kokatzen da. Plan horren helburua da adikzioak dituzten pertsonei eta haien senideei adikzioen fenomenoari eta udalerrian eskuragarri dauden baliabideei buruzko informazioa, orientazioa eta aholkularitza ematea. Halaber, drogek edo horrekin lotutako patologiek eragindako arriskuak eta kalteak murrizteko programen garapena sustatzea eta babestea proposatzen da planean, bai eta adikzioak dituzten pertsonekin eta haien senideekin Bilbon diharduten Elkarlaguntzako Taldeen eta elkarteen lana babestea eta indartzea ere.

Bilboko Udaleko Osasun eta Kontsumo Saileko Adikzioen Prebentzioko Negoziatuak koordinatzen du saioa, eta Bizkaiko Osasun Mentaleko Sareko Irantzu Gonzalez Llona psikiatrak ematen du.

Bizkaiko Osasun Mentaleko psikiatrak, Bilboko Adikzioen Elkarri Laguntzeko Taldeen Sarearekin batera (kasu honetan, La Cruz de Oro elkartearekin), adikzioa aztertzen du ikuspegi bikoitz batetik, ikuspegi sozialetik eta zientifikotik, hartara euskarri emozionala eta ezagutza klinikoa, baliabide espezializatuak eta adikzioa maneiatzeko estrategiak eskaintzeko.

"Festa-egun" gutxi batzuk, egokiak gehiegikerietarako eta berrerortzeetarako

"Gabonetan zaintzea" jardunaldia antolatzean, berriz gaixotzea prebenitzeak duen garrantziari erantzun nahi zaio, garai horretan gizarte-kontsumoa are normalizatuagoa baitago.

Gabonak eta "festa" bata bestearen ondoan daude. Gabonetako jaiek eragiten duten presio soziala bezalako ingurumen faktoreek eguneroko errutinak aldatzen dituzte eta arrisku estimuluak areagotzen dira, eta, pertsona batzuen kontrol-uste faltsuarekin batera, adikzioekin lotutako jokabide konpultsiboa eragin dezakete.

Adikzio-prozesuetatik oneratzeko bidean dauden pertsonentzat, aldi kritiko bihur daitezke Gabonak, eta hori ondo kudeatu behar da. Arrisku-egoerak aldez aurretik planifikatzea, psikiatriako profesionalen laguntzarekin, lagungarria izan daiteke muga argiak ezartzeko eta arrisku-egoeren eraginpean ez jartzeko, eragileak identifikatzeko eta alternatiba osasungarriak proposatzeko.