Hiriko auzoetako ondarearen eta historiaren zabalkundea sustatzen jarraituko du Bilboko Udala maiatzetik aurrera ospatuko den Bilbao Izan programaren edizio berriari esker. Ohi bezala, doakoak, irekiak eta publiko guztiarentzat eskuragarriak izango dira jarduera guztiak.

Trenbidea ardatz duten bisita gidatuak, Bilboko zenbait auzoren historiari buruzko ikus-entzunezko materialen proiekzioa, "Txio ta Txio" bideoen argitalpena (aurten Hiribilduko eskolei eta iraganeko hezkuntzari buruzkoak izango dira) eta Argazkineta proiektua (aurten San Adrianen oinarrituko dena) izango dira Bilbao Izan osatzen duten ekimenen osagarri.

Bilbao Izan batez ere tokiko biztanleei zuzenduta dago, baina hiria bisitatzen duten pertsonei eta, arrazoi desberdinengatik, hiribilduaren ezagutzan sakondu nahi duten guztiei ere dago irekita.

Bisita gidatuak

Maiatzean, ekainean eta uztailean zehar bisita gidatuak egingo dira, "Trenbidea Bilbotik jarraituz" izenburuarekin. Aurten, ibilbideak Ametzola, San Adrian eta Abusu auzoetan barrena ibiliko dira, haien historia ezagutarazteko, trenbidearen presentziaren hariaren bidez.

Bisita gidatuak aire zabalean izango dira, oinez eta doan, ordu eta erdiko iraupena izango dute gutxi gorabehera, ibilbide atsegin eta irisgarriarekin, eta parte-hartzaileek eduki historikoak modu atsegin eta argigarrian planteatuko dituen gida bat izango dute eskuragarri. Maiatzaren 7tik ekainaren 1era, ibilbideak Ametzolan egingo dira, ekainaren 4tik 29ra San Adrianen eta uztailean Abusun.

Euskarazko taldeak eta gaztelaniazkoak antolatuko dira eta gainera, auzo bakoitzeko bisita-talde batek zeinu-mintzairaren interpretea izango du. Jarduera horietan, erradiogida bana emango zaio parte-hartzaile bakoitzari. Hori dela eta, izena eman duten pertsonak elkargunera joateko eskatzen zaie, hasiera-ordua baino 10 minutu lehenago.

Ekimen honetan parte hartu ahal izateko, aldez aurretik plaza erreserbatu beharko da webgunean. Gainera, izena eman eta bertaratu aurretik kontuan hartu beharreko informazio guztia web orri horretan bertan egongo da.

Lehenengo bi asteetako Ametzolako bisita gidatuetan parte hartu nahi dutenek maiatzaren 5etik aurrera eman ahal izango dute izena, 9:00etatik aurrera. Bigarren hamabostaldirako, izena emateko epea maiatzaren 19an hasiko da, 9:00etan.

Auzoen historia, irudietan

Deustu, Deustuko Erribera, Arangoiti, Ibarrekolanda, Sarriko, San Inazio eta Elorrieta auzoetan oinarritzen da "Ezagutu dezagun gure auzoen historia irudietan" ekimena. Ekimen horren bidez, telebista-pantaila bat jarriko da San Inazio - Ibarrekolanda Udaltegian. Bertan toki hauen historian sakontzeko argazkiak eta ikus-entzunezko lanak erakutsiko dira.

Ikus-entzunezko materiala 2020an Argazkineta proiektuaren garapenean berreskuratutako argazkietatik dator, "Deustu: sentimendu baten jatorria" lanetik eta 2020an eta 2024an Txio Ta Txio proiektuaren esparruan landutako bideo laburretatik (anexioak).

Bideoak San Inazio - Ibarrekolanda Udaltegian ikusi ahal izango dira maiatzaren 5etik ekainaren 28ra, astelehenetik larunbatera, goizez eta arratsaldez, sarrera librearekin.

“Txio ta Txio” eta Argazkineta, udazkenean

Irailean "Txio Ta Txio" bideoen edizio berri bat hasiko da, aurten Bilboko eskolen eta iraganeko hezkuntzaren inguruan. Hori dela eta, udaleko sare sozialen bidez, gai honi buruzko pasadizo txikiak, datu ezezagunak, pertsonaia aipagarriak eta istorio bitxiak ezagutzera emango dituzte, formatu erraz eta atseginean, erraz ikusi eta partekatzeko moduan. Gainera, aurreko urteetako "Txio Ta Txio" bildumak berriro ikusi nahi dituzten guztiek Bilbao Kulturaren Youtubeko kanalaren bidez eskuratu ahal izango dituzte.

Udazkenean hasiko da, halaber, Argazkineta proiektuaren zazpigarren edizioa; oraingo honetan San Adrian auzoan oinarrituko da. Bilboko auzoetan ekoiztutako oroigarrien eta material dokumentalaren bilketa selektiboa egingo da berriro. Azkenik, parte-hartzaileei eta, oro har, herritarrei irekitako ekitaldi parte-hartzaile, publiko eta ireki batean, proiektu hau garatzen den hilabeteetan bildutako dokumentu, argazki zahar eta testigantzen bideo asko erakutsiko dira.

Bilbao Izan

Ekimen horiek guztiak Bilbao Izan proiektuaren parte dira. Proiektu honen izenean, Udalak Bilboren funtsa dena hedatzeko programa guztiak biltzen ditu: haren ibilbide historikoa, bere altxorrak, pertsona ospetsuek utzi duten arrastoa, ondare artistikoa, hiri-konfigurazioa, auzo bakoitzaren historia berezia, kaleak eta txoko enblematikoenak, etab.

Udal programa hau erabat konprometituta dago Bilbo Balioen Hiriarekin, Bilbon balio partekatuen esparru bat sustatu nahi duen proiektua, besteak beste, konpromisoa, ahalegina, ilusioa, parte-hartzea, sormena eta, bereziki, identitatea. Gainera, Bilboko 2023-2033 Kultura Plan Estrategikoarekin bat dator, kultura herritarrengana hurbiltzea sustatzen baitu, hiriaren kultura-nortasunaren ezaugarriei balioa emanez.