Bidebarrieta Kulturguneak Xabier Irujoren liburu berriaren aurkezpena jasoko du

Xabier Irujo idazleak "La mecánica del exterminio" liburua aurkeztuko du Bilboko Udaleko Bidebarrieta Kulturgunean datorren asteazkenean, urtarrilaren 22an. Egilearekin batera Txema Gutiérrez kazetaria izango da.

Literaturarekin topaketa hau 19:00etan hasiko da eta sarrera librea izango da lekua bete arte.

"La mecánica del exterminio" nazien kontzentrazio-esparruetan giza bizitzak suntsitzeko prozeduren azterketa izugarri eta zorrotza da. Milioika pertsona hiltzea erabaki ondoren, beharrezkoa zen aurrera eramateko sistema eraginkor bat aurkitzea. Zehaztasun kirurgiko batekin, Xabier Irujo idazleak holokaustoaren makineria biluzten du, Europan hedapen handia zuen ideologia batek genozidiorako protokolo sistematiko baten sorrera nola bultzatu zen azalduz.

Irakurleek urratsez urrats egingo dituzte makineria makabroaren faseak: desplazamendu behartutik eta kontzentrazio masibotik hasi eta garraio eta exekuzioraino. Prozesu basati horren fase bakoitza hoztasunez eta zehaztasunez azaltzen da, eta horrek sarraskiaren zorigaitz logikoa argitzen du: eraginkortasuna, arreta eta errentagarritasuna konbinatzen zituen prozedura.

“La mecánica del exterminio. La industrialización de la muerte en los campos de concentración nazis” lanak argia eman nahi dio historiako kapitulurik ilunenetako bati, hots, desafioari, hunkidurari eta gizateriaren aurpegirik txarrenari buruzko ikuspegi urratzailea eskaintzen du.

XABIER IRUJO

Nevadako Unibertsitateko Euskal Ikasketen Zentroko zuzendaria eta genozidio ikasketetan katedraduna da. Liverpooleko Unibertsitateko Manuel Irujo Katedran lehen ikertzaile gonbidatua izan zen eta Massachusetts Amherst-eko Unibertsitateko William Douglass Katedrako eta Boise State University-ko Eloise Garmendia Katedrako irakasle bisitaria izan da. Irujok gai honi buruzko hitzaldiak eman ditu Amerikako eta Europako hainbat unibertsitatetan.

Filologia, Historia eta Filosofian lizentziatua, Historia eta Filosofian bi doktorego ditu. Doktore tesi ugari zuzendu ditu eta bost argitaletxe akademiko eta unibertsitarioetako batzorde exekutiboetako kide da. Gainera, Gernikako Bakearen Museoko eta beste erakunde akademiko batzuetako kontseiluko kide da. Hamar liburu baino gehiago idatzi ditu, horien artean "Zumalakarregi y la República de los Pirineos", "En defensa de la independencia de Navarra", "778. Errozabaleko bataila", “Un regalo para Hiteler”, “Gernika. 26 de abril de 1937”. Gainera, hainbat artikulu idatzi ditu aldizkari espezializatuetan, eta sariak eta goraipamenak jaso ditu estatuan eta nazioartean.

TXEMA GUTIÉRREZ

Kazetari honek 20 urte baino gehiagoko esperientzia du hainbat komunikabidetan, eta gaur egun goizeko saio bat aurkezten du Onda Vasca irratian. Ekitaldien aurkezle, EITBko programetan ere parte hartu du.