Urian kirola sustatzeko dirulaguntzak eskatzeko epea irekiko da asteartean

Bilboko Udalak martxan jarri du urian kirola sustatzeko helburua duen dirulaguntzen deialdi berri bat. Hala, astearte honetan, apirilak 25, Bilboko kirol klub eta entitateentzako, kirol-ekitaldietarako eta banakako kirolarientzako laguntzak eskatzeko epea irekiko da, eta zabalik mantenduko da maiatzaren 14ra arte.

Eskabideak Bilbao Kirolaken webgunearen bitartez aurkeztu beharko dira. Era berean, eskabide-inprimakiak, oinarriak eta deialdiari buruzko gainerako informazioa egongo dira webgune horretan.

Deialdia lau programatan banatzen da:

• 1. programa (205.000 euro): Egiteko sozial eta federatiboa garatzeko, antolakuntza-irizpide espezifikoetarako, talde teknikoaren osaerarako, joan-etorrietarako, emakumeen presentzia sustatzeko, dibertsitate funtzionala duten pertsonen kirol-jardunerako, eta parte-hartzearen alorreko kirol-programetarako.
• 2. programa (34.100 euro): Bilbon egiten diren eta Bilbon eragina duten kirol-ekitaldietarako, non herritar guztiek parte hartu ahal duten, kirol osasuntsua, aisialdikoa eta integratua bultzatzen den, eta hiria sustatzen den. Eta izaera puntuala duten, eta, gehienez ere, 8 egun irauten duten kirol-eremuko prestakuntza-ekintzetarako ere bai.
• 3. programa (15.000 euro): Banako kirolarien jarduerari laguntzeko. Dirulaguntza hori eskuratu ahal izateko, Bilbon erroldatuta egon behar da —bi urteko antzinatasunarekin, gutxienez—, banako lehiaketazko kirola egin behar da, eta maila desberdinetako kirol-lehiaketetan parte hartu behar da (nazioarteko maila barne). Dirulaguntza ematerakoan, 2022an izandako emaitzak baloratuko dira.
• 4. programa (10.000 euro): Bilboko udalerrian umeentzako kirol-jarduerak antolatzen dituzten pertsona juridikoentzat, ikasleen gurasoen elkarteentzat, kirol-klubentzat, ikastetxeentzat, eta ikastetxeekin lotura duten entitate edo elkarteentzat.