BILBAO. Marijaiari ongietorria egiteko txupinazoarekin hasiko den 2017ko Aste Nagusia behar bezala ospatze aldera. Egitarauan hainbat ekitaldi izan arren, azpimarratzeko modukoak dira, alde batetik, urtero egiten den Elkartasun Eguna, aurten Down Sindromearen Fundazioaren aldekoa izango dena, eta bestetik, King Africa abeslari argentinarraren kontzertua.

Ohi denez, musikak leku zabala izango du konpartsaren egitarauaren barruan. King Africaren musika-eskaintzaren ondorioz, Pio Baroja plazan dagoen txosnara abuztuaren 24an (23:15etan) joaten diren pertsonak “eten gabe saltoka” ibiliko dira, harik eta gorputzean “dardarizo” atsegina nabaritu arte. Zuzeneko musika, baina, egunero izango da.

Bertokoak diren Mister Kul, Lea, Tracy, Unai Muguruza eta Ibai Sánchez DJek izango dute melodiak eta erritmoak gau guztietan jartzearen ardura. Horiez aparte, Gotzon Batikonek bere emanaldia birsortuko du Triki Showaren bidez, hots, trikitixaren eta musika elektronikoaren doinuak nahasten dituen emanaldiaren bitartez.

Horiez guztiez gainera, zuzeneko emanaldi asko eta asko ere izango dira Gogorregiren txosnan. Asier Bilbao showman bilbotarrak jendea probokatzen jardungo du berriro ere, bere kantuez eta umore onez, abuztuaren 23an (asteazkenean) karpapean izango diren pertsona guztien gozagarri. Bestalde, Godoysen pop eta soul nahasturak freskura emango dio abuztuaren 22ko (astearteko) gauari. Egun Nagusian bi emanaldi berezi izango dira agertokian, adinekoen egunari doakionez: ‘Nómadas’ taldearen rocka eta ‘Los Txikis’en bilbainadak, aldi berean egingo den herri-sardinadaren alaigarri.

Hala ere, zalantzarik gabe, egunik hunkigarriena abuztuaren 22a izango da (asteartea); izan ere, urtero legez, egun hori Elkartasun Eguna izango da. Aurtengoan, egun horretan biltzen den dirua Down Sindromearen Fundazioari emango zaio. Horrezaz gainera, Fundazio horretako kideak txandaka arituko dira txosnan, barra atzean konpartsakideekin batera edariak eta jakiak zerbitzen jardunez.

Aste Nagusia fundamentuz haste aldera, Gogorregi konpartsaren adin guztietako kideek adiskide arteko bazkaria izango dute abuztuaren 19an (larunbatez), eta Jaietako Egun Nagusian, hau da, abuztuaren 25ean (ostiralez), Gogorregiko adinekoek mus eta briska txapelketak antolatuko dituzte. Abuztuaren 22an eta 24an (asteartez eta ostegunez, hurrenez hurren) garagardo-dastatzea izango da La Salve etxearen eskutik; honen eskutik etorriko da karpapera, baita, herri kirolak ere.

Urtero legez, eta ezinbestean, Athleticen partidak indar handiz biziko dira Gogorregiren txosnan, abuztuaren 27an Eibarren kontra jokatuko den partida batik bat. Partida hori txosnatik bertatik zuzenean komentatuko dute Radio Nervión eta Telebilbaoren Bilbosporten taldekideek, Eduardo Velasco buru dutela.

Gogorregikook Aste Nagusi osoan ondo pasatzera animatzen zaituztegu. Ondo pasatzeaz gain, elkarrekiko errespetua ere aipatu nahi dugu, #Ez beti da ez gogoraraziz. Era berean, bat egiten dugu Euskadiko Gazteriaren Kontseiluak (EGK) sustatzen duen #GukEzetz kanpainarekin eta Bilboko Udalak abuztuaren hasieran abiarazi duen sentsibilizazio-kanpainarekin.

EGITARAU OSOA ? ASTE NAGUSIA 2017

Abuztuaren 19a, larunbata

13.30 Poteo-batukada

14.30 Adin guztietako konpartsakideen herri-bazkaria

18.00 Txupinazoa, Arriaga antzokiko plazan

23.15 Lea eta Mister Kul DJ

Abuztuaren 20a, igandea

18.15 Athletic ? Getafe partida

20.00 Herri Kirolak, La Salveren eskutik

23.14 Tracy DJ

Abuztuaren 21a, astelehena

12.00 Haur jokoak

23.15 Lea, Mister Kul eta Unai Muguruza DJ

Abuztuaren 22a, asteartea. Down Sindromearen Fundazioaren aldeko Elkartasun Eguna

13.30 Garagardo-dastatzea, La Salveren eskutik

20.30 Godoysen kontzertua, La Salveren eskutik

23.15 Lea eta Mister Kul DJ, Gotzon Batikonen triki showarekin

Abuztuaren 23a, asteazkena

23.15 Asier Bilbaoren showa

00.30 Ibai Sánchez DJ

Abuztuaren 24a, osteguna

18.30 Garagardo-dastatzea, La Salveren eskutik

20.45 Athletic ? Panathinaikos partida

23.15 King Africaren kontzertua

00.15 Lea eta Mister Kul DJ

Abuztuaren 25a, ostirala

14.30 Herri-marmitakoa, adinekoentzat

17.00 Mus eta briska txapelketak

19.00 Sardinada eta ‘Los Txikis’ taldearen emanaldia

21.00 ‘Nómadas’ taldearen kontzertua, La Salveren eskutik

23.15 Ibai Sánchez DJ

Abuztuaren 26a, larunbata

14.30 Herri-bazkaria

23.15 Lea eta Mister Kul DJ

Abuztuaren 27a, igandea

18.15 Eibar-Athletic partida, Radio Nerviónen Bilbosporten zuzeneko komentarioekin