BILBO. "Itsasadarraren 1.001 ametsak" izenburupean, ekimenak teknika librean egindako 1.000 marrazki jaso nahi ditu, liburu formatuan biltzeko, maiatzetik ia 20.000 pertsonak bisitatu duten erakusketa horri amaiera emateko, museo bilbotarreko arduradunek adierazi dutenez.
Erakusketa abenduaren 29an amaituko da, Tor Magoaren doako ikuskizuna jasoko duen eta familia osoari zuzenduta egongo den jaiarekin. Sariak zozkatuko dira euren marrazkiekin itsasadarraren arte albuma osatzeko parte hartzen duten ume guztien artean.
Horrela, partaide guztien artean sinaturiko Athleticen lau kamiseta ofizial zozkatuko dira. Jaia eguerdiko 12:00etan hasiko da eta sarrera librea izango da, leku guztiak bete arte.
Gonbidapenak museoan bertan har daitezke jada, itsasadarri buruzko marrazkia aurkeztean. Parte hartu nahi duten ume guztiek abenduaren 29ko goizeko 11:00ak arte egin ahal izango dute, euren marrazkiak museoaren txarteldegian emanez. Teknika librea den arren, parte hartzaileek txarteldegian bertan jaso daitekeen edo museoaren webgunetik jaitsi daitekeen txantiloi komuna erabili beharko dute.
"Itsasadarraren magia - 35 urte bizia sortuz" proiektua Bilboko Itsasadarra Itsas Museoak, Bilbao Bizkaia Ur Partzuergoak eta Azti itsas ikerketarako zentro teknologikoak antolatu dute, Bizkaiko Aldundiaren, URA Uraren Euskal Agentziaren, Bilboko Portuaren eta Iberdrolaren laguntzarekin, animalia eta landare bizitzarik ez zuen eta oso egoera txarrean zegoen itsasadarra ingurumenaren ikuspegitik berreskuratzera eraman duen hiru hamarkadatako prozesua ezagutarazteko helburu nagusiarekin.
