Euskotrenek zenbait lineatako ordutegiak aldatu ditu astelehen honetan

BILBO. Euskotrenen hainbat tren linearen ordutegi berriak astelehen honetan abian jarri dira. Berrikuntza nagusia da astegunetako maiztasuna handituko dela Lasarte-Irun-Lasarte (E2) eta Lezama-Kukullaga/Etxebarri-Lezama (E3) lineatan. Zerbitzua 15 minutuan behin emango da. Hain zuzen, Euskotrenek jakinarazi duenez, E2 Lasarte-Hendaia linean, trenen maiztasuna handituko da lanegunetan Lasarte-Irun tartean. Trenak 15 minutuan behin eskainiko da bi noranzkoetan jardunaldi osoan, 30 minutuan behin zirkulatuko duten azken trenen kasuan izan ezik. Larunbat goizetan trenek 30 minutuan behin ibiliko dira, eta arratsaldetan 15 minutuan behin.

E3 Kukullaga/Etxebarri-Lezama linean, astegunetan maiztasuna hobetuko da eta trenak 15 minutuan behin izango dira, jardunaldiko azken trenen kasuan izan ezik (30 minutuan behin). Larunbat, igande eta jaiegunetan 15 minutuan behin izango da zerbitzua. Aldaketa horiek bi noranzkoetan izango dute eragina.

E1 Bilbo/Matiko-Donostia/Amara lineari dagokionez, 22:44an Debatik Amarara doan zerbitzua desagertu egingo da, eta azkena 21:44koa izango da. Amaratik Debara irtengo den azken trena 20:50ekoa izango da, 21:50ekoa Zumaiaraino baino ez baita helduko. Halaber, metroaren 3. linean (Kukullaga/Etxebarri-Matiko), ostiraletan eta jai bezperetan goizaldeko 02:00ak inguru arte egongo dira trenak.

Bestalde, E4 Bilbo/Atxuri-Bermeo linean desagertu egingo dira 15:59ko Gernika-Atxuri eta 15:14ko Atxuri-Bermeo tarteetako tren zuzenak. Goizeko zerbitzu zuzenek orain arte bezala jarraituko dute.

Informazio gehiago behar duten erabiltzaileek Euskotrenen 944 333 333 telefono zenbakira dei dezakete. Horrez gain, informazioa jaso dezakete geltokietan eta geralekuetan, www.euskotren.eus webgunean, @euskotrenEJGV Twitter gunean eta app ofizialean.