Datorren larunbatetik aurrera eta azaroaren 19ra bitartean, feminismoa eta gazteria hurbiltzeko helburua izango duten hiru tailer eskainiko ditu Amorebieta-Etxanoko Udalak. Udalerriko gazteei bideratutako ekimen hau Udalaren jabekuntza programaren barruan antolatuta dago.
Hilekoaren inguruko coaching eta yoga
Lehenengo tailerrak hilekoa aztertuko du coachingetik eta yogatik. Horrela, yoga eta ikuspegi biopsikosozial-holistikoa erabiliz, bertaratzen diren neska gazteek hilekoaren intrusio patriarkala ekiteko behar dituzten oinarrizko ezagutzak lortuko dituzte. Tailerra sororitatea nagusi izango den inguru batean emango da, non elkar zaintza izango den. Datorren urriaren 22an izango da eta 16 eta 20 urte bitarteko neskei zuzenduta dago. Lau orduko iraupena izango du, 10:00etatik 14:00etara.
Mutilok/Gizonok zer? Maskulinitate disidenteak
Mutilen inplikazioa funtsezkoa da berdintasun-prozesuetan, eta haien parte-hartzea beharrezkoa da hori lortzeko. Horrela, 15 eta 18 urte bitarteko mutilei zuzendutako bigarren tailer honen helburua da etorkizuneko gizonak kontzientziatzea maskulinitateak, banakakoak zein kolektiboak, nola eragiten duen aztertzeko beharraz. Tailerra azaroaren 4an izango da eta bi orduko iraupena izango du, 18:00etatik 20:00etara.
Elikadura kontzientea
Azkenik, feminismoa eta gazteria zikloak elikaduraren kontzientziaren gaia ere jorratuko du. 16 eta 20 urte bitarteko gazteei zuzenduta, tailer honek elikaduraren inguruan ikasteko eta egunerokoan oinarrizko ohiturak eta tresnak integratzeko garrantzian sakonduko du, janariaz gozatu ahal izateko, kezkatu gabe eta sufrimendu-iturri izan gabe. Tailerrak 8 orduko iraupena izango du eta bi egunetan emango da, azaroaren 12an eta 19an, 10:00etatik 14:00etara.
Izen-ematea
Interesa duten gazteek aldez aurretik izena eman beharko dute online inprimaki bat betez, Udalaren webgunean. Epea urriaren 31ra arte egongo da zabalik.
