BARAKALDO. Atzo, hilak 8, astelehena, Euskadi deseskalatzearen bigarren fasean sartu zen. Horrekin batera, bigarren fasean itxita egon behar ziren hainbat establezimenduk ireki ahal izan dute. Esate baterako, integrazio soziokulturalerako zentroak. Barakaldokoak, Bakea eta Anaien zentroak, atzo ireki zituzten ateak % 75eko edukierarekin. Oraingoz, bigarren eta hirugarren graduko mendekotasuna duten pertsonei emango zaie lehentasuna.
Zehazki, Integrazio Soziokulturalerako Zentroko (CIS) eguneko zentroan 45 lagun (edukieraren % 75) eta La Pazera 15 erabiltzaile (edukieraren % 75) joan ahal izango dira. Gaurtik aurrera sartu ahal izan dira zentro horietako erabiltzaile guztiak, pandemia hasi aurretik zentroek plazak libre baitzeuzkaten.
"Kalte handia eragin die eguneko zentroak ixteak erabiltzaileei eta haien familiei; horregatik, garrantzitsua da zerbitzua pixkanaka eta beharrezko berme guztiekin berreskuratzea", adierazi du Mikel Antizar Gizarte Ekintzako zinegotziak. Zentro horietan mendekotasuna dutenen autonomia lantzen da, maila fisikoan eta kognitiboan, mendekotasuna areagotu ez dadin . Errutina garrantzitsu hori berreskuratzeko aukera ematen die mendekotasuna dutenei zentroak berriz irekitzeak", azpimarratu du.
Segurtasun-neurri guztiak errespetatuz ekin zaio jarduerari berriro. Horrela, dagozkien norbera babesteko ekipamenduekin lan egingo dute langileek, eta sartu aurretik eskuak garbitu eta tenperatura kontrolatu beharko dute, berriz, erabiltzaileek. Maskara nahitaez erabili behar da. Gainera, erabiltzaileen segurtasuna bermatzeko, instalazioak sektorizatu dira,talde txikiagoetan egin ahal izateko jarduera.
