2022rako Ordenantza Fiskalen proposamena definitzeko parte-hartze prozesua ireki du Etxebarriko Udalak, etxebarritarrak prozesu honetara hurbildu ahal izateko. Proposamenak egin nahi dituzten pertsona, erakunde eta talde guztiek irailaren 8ra arte izango dute horretarako aukera, sac@etxebarri.eus helbide elektronikoan edo udal iragarki-oholean.
Etxebarriko Udaleko arloek urtero berrikusten dituzte zerga-ordenantzak eta prezio publikoak arautzen dituzten arauak. “Berrikuspen horren helburua araudia indarrean dagoen legeriara egokitzea da”, azaldu dute Udaletik. Halaber, “berrikuspen horren bidez, toki-administrazio honek hobeto funtziona dezan egin beharreko aldaketak eta egokitzapenak sartu nahi dira, egokitzapen kuantitatiboak barne”. Ildo horretan, adierazi behar da, 2021eko aurrekontuaren arabera, udal-tasak eta-zergak udal-sarreren % 34 direla, eta, “beraz, horien garrantzia funtsezkoa dela udalerriak dituen zerbitzu publikoak mantentzeko” eta oso garrantzitsua da udalerri baten egunerokoan.
Aldaketen xedea da efizientzia hobetzea tasak eta prezio publikoak ezartzeari dagokionez, “bai eta zerbitzuak emateagatiko kontraprestazioak ere, erabiltzaileek eta, aldi berean, zerbitzuaren onuradunek sortutako gastu publikoa finantzatzeko”, diote. Normalean, irailaren amaieran egiten den osoko bilkuran onartzen da, aldaketak onartu ahal izateko eta hurrengo urteko urtarrilaren 1ean indarrean jarri ahal izateko.
Hori horrela izanik, Aurretiazko kontsulta publikoa deritzon prozesua ireki du Udalak, espedientea hastea dakarrena. Parte-hartze horren helburua da, udalerriarentzat hain garrantzitsua den gai batean, herritarrek zenbait ideia eman ahal izatea ordenantza horiek osatze aldera.
