San Jorge jaiak Santurtzira itzuli dira
Santurtziko Udalak ostiral honetan iragarri du San Jorge jaiak itzuliko direla, patroiaren omenez. Zehazki, apirilaren 22tik maiatzaren 1era bitartean hainbat ekitaldi egingo dira parke nagusian, Gernika parkean, oinezkoen kalean eta arrantza-portuan. Jakinarazi dutenez, udalerriko hainbat erakundek, kirol, kultura edo gizarte esparruetakoek, eta Santurtziko txosnagueak, bigarren asteburua antolatzeaz arduratzen denak, parte hartu dute.
"Bi urte igaro dira jai hauek fisikoki ospatu ezinik. Orain berriro elkartu gaitezke kalean, aurrez aurre, eta egun horietarako indarrean dauden neurriak mantentzen jarraitu behar bada ere, jai hauek santurtziarrentzat direnaren funtsaren zati bat berreskuratu ahal izango dugu" adierazi du Aintzane Urkijo Santurtziko alkateak, Itsazain Ortolatxipi Kultura eta Euskara zinegotziarekin batera egindako prentsaurrekoan.
Bi asteburu horietarako aurreikusi den programazioaz gain, alkateak berrikuntza bat adierazi nahi izan du ohiko programazioari dagokionez, hau da, bi urtez behin Lehoi Ernai Sariak banatzeko ekitaldia. "Dakizuenez, 2020an Jon Koldo García de Iturrospe maitea hil zen, zeinarekin lanean aritu ginen sari hauek emateko. Zoritxarrez, ospatu aurretik utzi gintuen, eta orain 2020ko edizioari ekingo diogu, bertan behera utzi behar izan baikenuen, baita 2022ari dagokion edizioari ere" azaldu du.
"Aurten arte argia ikusi ez badute ere", sari horiek Santurtziko gure herriaren memoria historikoa berreskuratzen, mantentzen, sustatzen eta bistaratzen laguntzen duten pertsonen lana aitortzeko sortu ziren. Horrela, ospakizuna apirilaren 23an izango da, 13:00etan, Casa Torre jauregian, eta sari horien banaketaz gain, omenaldi sentitua izango da berorien sorrera bultzatu zuenarentzat eta gure herriaren kultura eta historiaren alde hainbeste eman zuenarentzat, Jon Koldo maitea zenarentzat, "Santurtzi historian zehar" blogaren egilea bera.
Era berean, jai horietako programazioan dagoen beste ekitaldi esanguratsu bat Subversión X taldeak 30. urteurrena dela-eta eskainiko digun kontzertua izango da.