Txikienen eguneroko soinuek badute soinu-banda. ‘Barruko hotsak’ du izena eta Leire Bilbao (Ondarroa, 1978) idazlearen eta Maite Mutuberria (Eltzaburu, 1985) ilustratzailearen azken lana da. Erritmoz beteriko poema-liburua, irakurle guztiak gozatuko dituena. Eta dena, umorez betetako irudi oso bisualez lagunduta: “Belarriekin irakurtzeko eta begiekin entzuteko liburua”. Lan honek Euskara eta Literatura 2022 saria jaso du euskarazko gazte eta haur modalitatean, bere konposizio, maketazio eta ilustrazio lan bikainagatik.
Hau ez da Leire Bilbaok eta Maite Mutuberriak elkarrekin egin duten lehen lana. ‘Mokotxiki’ (2017), ‘Bichopoemas y otras bestias’ (2019) eta ‘Bestiapoemas y otras bestias’ (2021) dira batez ere sei urtetik gorako haurrei zuzendutako egindako kolaborazioak. Azkena, ‘Barruko hotsak ', hamar kapitulutan, txikienek egiten dituzten soinuak sortzen saiatzen da, jaikitzen direnetik oheratu arte: komunean entzuten dutena, janzten direnean, eskolara bidean, lo dauden bitartean… Fusio sortzaile horrekin bat egin du Xabier Zabala musikari eta konpositoreak ere, poema bakoitzerako soinu-banda perfektua sortu baitu. QR baten bidez artistak sortu dituen soinuak entzun daitezke.
Liburu bikaina
Manuel López, Larraitz Idarreta, Karla Fernández de Gamboa, Ziortza Onaindia eta Patxi Zubizarretak osatutako epaimahaiak bikain baloratu du liburu hau: “Kaligramaren generoa berritzen duen poesia bisuala da, errimaz eta erritmoz betea”. Liburuko testua, jolas tipografikoak eta irudiak ustekabean elkartzeak sortzen duen harridurak askotariko irakurketak egiteko aukera ematen du. Era berean, konposizio, maketazio eta ilustrazio lan bikaina nabarmentzen da. Hain zuzen ere, irudiak Maite Mutuberriak egin ditu, eta aurten Literaturako Euskadi saria ere jaso du, Literatura Lanaren Ilustrazioaren kategorian.
Leire Bilbaok hogei lan baino gehiago argitaratu ditu eta horietako batzuk sarituak izan dira. Batzuk aipatzearren, 2013ko Etxepare album ilustratuen saria, 2016ko Lizardi saria, 2017ko Euskadi haur eta gazte literatura saria edo 2019ko Kirico saria, Lauaxeta Poesia saria jaso du Etxeko urak poema liburuagatik.
