'La Jaula de las Locas' antzerki ikuskizuna Arriaga Antzokira heldu da

Eszenaratze berri hau Jerry Herman eta Harvey Fiersteinen formatu handiko bertsio musikalean oinarritzen da, 1983an Broadwayn estreinatu zen eta sei Tony sari irabazi zituen hartan. Horrez gain, 2010eko Broadwayren bertsio revivala ere hartzen du erreferentzia gisa, hiru Tony Sari eta hiru Drama Desk Awards irabazi zituena. La Jaula de las Locas generoaren historian bereziki garrantzitsua den ikuskizuna da, sozialki sentikorrak diren gaiak modu ireki eta optimistan eszenaratzeko estiloan eta moduan eragin erabakigarria izan duena. La Jaula de las Locas Broadwayko historian mila emanaldiak gainditu zituen lehen musikala izan zen, eta baita besaulki-patioko sarrerak 47.5 dolarretan kobratu zituen lehena ere. Broadwayn izandako arrakastaren ondoren, La Cage aux folles West Endera iritsi zen, eta baita Berlinera ere, eta orduz gero etengabe antzeztu da mundu osoan.

Historiako musikalik ezagunenetakoa da eta hainbat dira zinemarako egin diren egokitzapen arrakastatsuak. Testuaren gaztelaniazko bertsioa Roser Batalla eta Roger Peñarena da. Muntaia oso txalotua Nostromo, Llàcer eta Guix-ek egindako La Jaula de las Locas obraren bertsioa hainbat bider saritu dute estreinatu zenetik: “Premis de la Crítica” sarietan musikalak 4 izendapen jaso zituen eta Musikaleko Aktore Onenaren kategorian irabazi zuen, Àngel Llàcerren antzezpenagatik. Gainera, "Premis Butaca" sarietan 5 izendapenetatik 4 eskuratu zituen honako kategoria hauetan: Musikaleko Aktore Onena —Àngel Llàcerren paperarengatik—, Musikal Onena, Jantzien Diseinu Onena eta Karakterizazio Onena. Musikala Madrilen eta Bartzelonan izandako arrakasta handiaren bermearekin iritsiko da Bilbora, bi hiri horien artean 300.000 ikusle baino gehiago izan ondoren.

Gainera, kritikek gogotsu erantzun zuten Bartzelonan eta Madrilen eta, besteak beste, azpimarratu zuten La Jaula de las Locas “apoteosikoa” dela (La Vanguardia) “optimismo txute bat” (El País), “musika, glamourra eta dibertsio handia” (Time Out), edo “sekulako festa” (El periódico de Catalunya), kritiketako batzuk aipatzearren. Oholtzaratze berri honek bi ordu eta erdiko dibertsioa proposatzen du; horri dekoratu handien glamourra eta 140 jantzi-aldaketak gehitu behar dizkiogu. La Jaula de las Locasek generoaren historia markatu duten 13 abesti proposatzen ditu, hala nola: “Yo soy lo que soy” (“I am what I am”) edo “La vida empieza hoy” (“The best of times”). Azken batean, ikuskizunak musikal handi bati dagozkion elementu guztiak ditu.

SINOPSIA

Albin eta Georges bikotekideek bizimodu baketsua dute. Saint Tropezeko La Cage aux Folles gaueko klubaren jabeak dira, baina ezusteko albiste batek erabat aldatuko du dena. Jean Michel, Georgesen semea, ezkontzera doa, familia-bizitzako baliorik tradizionalen defendatzaile porrokatua den diputatu ultrakontserbadore baten alabarekin. Hain desberdinak diren bi familiaren arteko topaketa harrigarriak maitasunez eta eldarniozko egoerez beteriko komedia dibertigarria piztuko du. La Jaula de las Locas askatasun indibidual eta kolektiboaren aldeko kantu handia da.

Bere mezua indartsua eta beharrezkoa da duela oso gutxira arte erabat egonkortutzat jotzen ziren era guztietako gizarte-askatasunak berriro zalantzan jartzen ari diren garai hauetan. Eta gai unibertsal baten bidez helarazten du: mundu guztiarentzat jarraibide eta jokabide estandarrak ezartzen dituen mundu honetan haize kontra joateko ausardiaren bidez. Emanaldi bakoitzak “La Jaula” festa bihurtzen du, joie de vivrearen ospakizun; badakigu nola hasten den, baina inoiz ez nola amaitzen den! Oholtzaratze ausarta, koreografia harrigarriak, jantzien diseinu ikusgarri eta oparoa, eta gai unibertsalak. Horiengatik guztiengatik da historiako musikal ospetsuenetako bat. Sarrerak jada ohiko salmenta bideetatik erosi daitezke: www.teatroarriaga.eus webgunean edo antzokiko leihatilan aldez aurretiko salmenta ordutegian. Broadwayko musikal handiari ezarritako prezioak 20 eta 59 euro artekoak dira, deskontu ezberdinekin