EZ al dira pixka bat nekagarri bihurtu urte amaierako zerrendak? 2017ko hamar diskorik onenak, hamar libururik onenak, NBAko hamar jokaldi ikusgarrienak, telebistako hamar unerik aipagarrienak, hamar serie onenak, prentsako hamar argazki bikainenak… Arlo bakoitzeko hamar une eta produkturik onenak azpimarratzeko joerak gora egin du urteekin, agian gu ere gaur egungo hainbesteko eskaintzaz galduta gaudelako eta gida moduko bat behar dugulako liburu bat, pelikula bat, edo telebistako saio bat aukeratzeko orduan.

2017. urtea amaitzeko hiru egun eskas geratzen diren honetan, bada, nik ere zerrenda bat proposatu nahi dizut. Edo, hobe esanda, lerro hauek irakurtzen ari zaren horrek zeure zerrenda pertsonala egitea proposatu nahi dizut, 2017. urteko zure unerik onenekin. Ariketa honen helburua ez litzateke hainbeste amaitzen dagoen urte honetan egin duzuna gogoratzea, baizik eta 2018. urterako ondo sentiarazten zaituzten gauzak zeintzuk diren argi ikustea eta ondorioz, urte berrian hauei denbora eta gogo gehiago eskaintzea. Beraz, hartu ezazu boligrafoa eta papera eta idatzi zure une onenen zerrenda. Pentsatu zein momentutan sentitu zaren hoberen amaitzen dagoen urte honetan. Erraza dirudi, baina ez pentsa, behin idazten jarrita, ez da hainbeste.

Zeintzuk izan dira zure unerik onenak? Agian zerrenda horretan agertuko dira txikitako lagunekin egin zenuen afari hura eta ondorengo parranda, edo mendi hartara igo zinen eguna, edo pasiozko gau ahaztezin hura, edo gelditu gabe irakurtzen igaro zenuen eguna, edo zure alabaren abesbatzaren kon-tzertuko une hunkigarri hura, edo lagunekin hainbeste gozatu zenuen kon-tzertu hura, edo maratoi erdia bukatzea lortu zenuen eguna, edo bi eguneko bidai hura… Bakoitzak zenbait argi aurkituko ditu ilun asko ere izango zituen urte honetan.

Irakurri ezazu behin baino gehiagotan zerrenda eta saiatu barneratzen zein-tzuk izan diren zure une on horiek. Orain, 2018an berriz haien bila joatea besterik ez duzu egin behar. Haiei denbora eta gogo gehiago eskaintzea. Azken finean, hor baitaude zure zoriontasunaren giltzetako batzuk.